অনিন্দিতা কলিতা
কাহিনীবোৰ
পখিলা
উৰি আহি
দুচকুতে বহি লয়
মূৰটো ঘূৰালেই এটি গল্প
এখনি উপন্যাস
লিখিম
পৰোঁ বুলিয়েই
আহি পৰা পখিলাৰ
লাহী কাহিনীবোৰ
লিখিম
সোনকালে সৰি পৰিব খোজা পাখিৰ কঁপনিবোৰ
লিখিম
কেতিয়াবা কলমটো
আঙুলিত লাগি থকা এডাল কাঁইট
না ওলাই আহে
না কষ্ট সামৰে
কাঁইটৰ আঁচোৰে আঙুলিত
বিৰিঙোৱা তেজ
দুচকুৰ পানীৰে পখালি
লিখিম
জী থাকিবলৈ লিখি থাকিম
পখিলাৰ অন্য কাহিনী!
