জ্যোতিনীলিমা গগৈ
গভীৰ টোপনিৰ পৰা উঠি আহিছোঁ
মৈদামৰ কাষতে লগ পাই ককাদেউতাৰ হুমকি
— সিদিনা আহিছিলোঁহে
অতপালি তহঁতৰ
বোলোঁ সাৰে আছনে?
বুজি পালোঁ
এৰি যোৱা ঘৰৰ থাপনাৰ চাকিত সেয়া
ককাৰ তেজ আৰু ঘাম
চিকচাক মজিয়াত আমাৰ মৌ-মেল
বাতামী বেৰত অঁৰা পহুৰ শিং
অন্তেষৰ জঁপাৰ পৰা বেতনিৰ ঔলৈকে
জপনা-দুৱাৰ-ধূতি-নীতি গৌৰৱ অপাৰ
গো-বাটেদি গৈ গৈ কঠিয়ানি বেৰাত সোমাইছোঁ কি নাই
চিলনী এটা হৈ ককাই যেন কাণৰ কাষতে চিঞৰি যায়
— হেৰৌ বুজাই নাই তই
আগলৈ মূৰ তুলি চা
— ক’তনো ককা?
সমুখত দেখোঁ পকা মধুৰিজোপা
— গজমূৰ্খ, সমুখত তোৰ ঘাতক দুনিয়া
দেখি আছোঁ সকলো
অথচ শোৱাৰ ভাও লৈছোঁ
চাই আছোঁ
দুখ-শোক-প্ৰেম-যাতনাৰ শৰত ধৰাশায়ী খোদ ব্যাধ
চাই আছোঁ— দেখা নাই
শুনি আছোঁ— শুনা নাই
সাৰে আছোঁ মাটিত মুখ গুঁজি
সমুখত ঘাতক দুনিয়া
কথা দিলোঁ একো দেখা নাই...
আমোলাপট্টি, ঢকুৱাখনা,
লখিমপুৰ— ৭৮৭০৫৫
