নিৰু দত্ত
দুগালত সানি চন্দনৰ গুড়ি
ঘৰচিৰিকা ওলাল বাজ
বাহত থাকিল পোৱালি দুটা
চিৰিক চিৰিক মাত ।
আইদেউৰ চোতালত মৰণা মাৰিছে
দুহালকৈ বলধ যুটি,
সৰিয়হ মাটিমাহ খেচাৰি কলামাহ
চাপৰিত কৰিছিল খেতি ।
তাৰে এগালমান কঢ়িয়াই ঠোঁটতে
আনিব সুৰুৎকৈ বাচি
ভুৰুংকৈ উৰি থপককৈ পৰি
থ’বহি বাহতে সাঁচি ।
ইম্মানটো যে ভয় ঘৰচিৰিকাৰ
হ'বলৈ বাহৰ বাজ
গছ-বন নাই কংক্ৰিটৰ চহৰ
চৌফালে বিকট আৱাজ ।
মইনাই নাপায় সমূলি সময়
কি চৰাই চৰে বনত
পুৱাৰ স্তুতিগীত কল কাকলিয়ে
নিদিয়ে প্ৰশান্তি মনত ।
আগেতে ঘৰে ঘৰে উছৱ -পাৰ্ৱণত
পিঠা গুড়িৰ আল্পনা আঁকে
অতি উলাহেৰে জঁপিয়াই জঁপিয়াই
খুটি খায় ঘৰচিৰিকা জাকে ।
খেৰী বা টিঙৰ টুপ ভঙা ঘৰ
ঘৰচিৰিকাই পচন্দ কৰে
আটোম-টোকাৰি খেৰ-কূটাৰে
তাতেহে বাহটি তৰে ।
যিবা এটি তেনে দেখিবা আছে
আমাৰ আইদেউৰ ঘৰ
লাকপাকুৰ পাৰ ৰুণ দিয়া কপৌ
কোনো যে নহয় পৰ ।
আইদেৱে পুৱাই চাউল ছটিয়াই
আইচ আইচকৈ মাতে
লগাই কোৰ্ঢ়াল অনেক চৰাই
জাকি মাৰি উৰি আহে।
অকলশৰীয়া লখিমী আইদেউৰ
পখীলৈ অন্তৰৰ টান
তৰহে তৰহে দিছে সাজি বাহ
খুদকণ দুটামান ।
চৰাই চুবুৰিত বিলুপ্তিৰ পথত
ঘৰচিৰিকা অতি মৰমৰ
ম’বাইল টাৱাৰৰ উচ্চ তৰংগই
কলিজা কৰে ধৰফৰ ।
আহাঁচোন আমি সংকল্প লওঁ
চৰাইৰ ল'ম চবে যতন
নিদিওঁ হ'বলৈ সমূলি বিলুপ্ত
ঘৰচিৰিকাক কৰিম মৰম ।
********
ঠিকনা :
সৰুপথাৰ - ৭৮৫৬০১
গোলাঘাট
৭০০২২৪১১৪৫