হেমচন্দ্ৰ কছাৰী
অণ্ডকোষত মাইক্ৰ’প্লাষ্টিকৰ ভৰ
শূন্য এটাৰ কিৰিলিত নিদ্ৰা সৰিছে
সপোন ভাগিছে
নিদ্ৰাহীনতা মানেই কেৱল তগৰ-জবা অথবা
ইচাট-বিচাট ভোকৰ তামাচা নহয়
ভয়
শোকৰ মালিতা গাই গাই দীন দাইটি- নল বৰপাইহঁতে
কাণ থিয় কৰি ভয়ে ভয়ে শুই পৰে
ধূসৰ হৈ পৰিল নৈ পাৰৰ ছবি
সন্ধিয়া এইবাটেদি এতিয়া
টোকাৰী গীতৰ সমদল নাহে
নাহে বৰষুণ বিচাৰি নাঙল-ঢেঁকী চুৰ কৰা
ভেকুলীৰ বিয়া পতা
সেই তেজাল ডেকাজাক
এতিয়া দিন-ৰাতি একাকাৰ কৰি
এজাক কীটে গো-গ্ৰাসে গিলিছে
জেউতি
কেৱল জেউতি
বৰ আচৰিত প্ৰাণী ইহঁত
প্ৰেমৰ জালতো নপৰে
ঔষধৰ জালতো নমৰে
ইহঁতৰ দুচকুত জিলিকি থাকে
চিৰ খৰাং বতৰৰ ঠিকনা
আৰু মঙহ নথকা বাহু-বুকুৰ অদ্ভুত নক্সাবোৰ
যেন
একো একোটা বিষাক্ত সাপৰ বকলা
বহুল চৰ্চা হৈছে
ইহঁতে হেৰুৱাব নেকি মাটি
আছে নেকি পৰ্দাৰ আঁৰতো অজীণ-পাতকী
কোনোবা ৰৌ-বৰালি !
ভ্ৰাম্যভাষ-৯৯৫৭৫৪২০৭০
