ধ্ৰুৱজ্যোতি দাস
বৰ লাজ লাগিব জানা,
যুদ্ধৰ বিষেৰে জন্ম পোৱা অপুৰঠ শিশুহঁতে
এদিন যেতিয়া তোমাৰ কথা পঢ়িব
সিহঁতৰ পাঠ্যপুথিত
লিখিব স্কুলৰ ডেক্সত...
বৰ লাজ লাগিব৷
বৰকৈ লাজ লাগিব জানা,
গোলা-বাৰুদৰ ধোঁৱাবোৰ পি পি
গৰ্ভৱতী গছবোৰে যেতিয়া
সেউজীয়া পাত মেলিব নোৱৰা হ’ব
ক’লা-ধোঁৱাৰঙী পাতেৰে ভৰি পৰিব
অৰণ্যৰ উপনিষদ -
বৰকৈ লাজ লাগিব৷
বৰকৈ লাজ লাগিব জানা,
নিচুক উদৰত যুঁজৰ দীঘল ঠোঁট
পখলাৰ পিচত
ত্ৰাসৰ ঘোলা বতাহত ঘূৰি থাকিব মাকহঁত -
ঘেঁহুৰ পথাৰবোৰৰ
গোমধানৰ পথাৰবোৰৰ
বতাহ ফালিবলৈ,
পণিয়লী পোণাৰ শৰীৰ ল’বলৈ
তিৰোহঁতে যেতিয়া যুগলৈকে আৰু
প্ৰসৱ কৰিব নোৱাৰিব শিশু শৰীৰৰ শিশু...
বৰ লাজ লাগিব৷
বৰকৈ লাজ লাগিব জানা,
তোমাৰ বাবেই যেতিয়া ঠিক তেজৰ
দৰে ডোঙা বান্ধি থাকিব হাহাকাৰবোৰ
আৰু তোমাৰ বাবেই তেজৰ
ডোঙাৰ তলত এখন দেশৰ মানচিত্ৰ...
বৰ লাজ লাগিব৷
বৰকৈ লাজ লাগিব জানা,
তোমাৰ বাবেই
তেজৰ ডোঙাৰ তলত এই দেশ
ইউক্ৰেইন ! ইউক্ৰেইন !/
