ড° বুলজিৎ বুঢ়াগোহাঁই
মানুহৰ জীৱনত কেৰিয়াৰ এক গুৰুত্বপূৰ্ণ অধ্যায়৷ কেৰিয়াৰ মানে
কেৱল এখন চাকৰিৰ সীমাত সীমাৱদ্ধ নহয়; ই মানৱ জীৱনৰ লক্ষ্য, জীৱন পদ্ধতি আৰু সমাজত নিজৰ
স্থান নিৰ্ধাৰণৰ মূল স্তম্ভ৷ কেৰিয়াৰ গঢ়াৰ ভেঁটি হৈছে শিক্ষা, আৰু কিতাপ পঢ়াই হ’ল সেই শিক্ষাক সমৃদ্ধিশালী কৰা আৰু পূৰ্ণতা দিয়াৰ একমাত্ৰ উপায়৷
কিতাপ হৈছে জ্ঞানৰ অসীম ভাণ্ডাৰ, য’ৰ পৰা
মানুহে আহৰণ কৰে নতুন তথ্য, সৃষ্টিশীল চিন্তাধাৰা, পৰিশীলিত অনুসন্ধিৎসু দৃষ্টিভংগী আৰু জীৱনৰ পথত
আগুৱাই যাবলৈ প্ৰেৰণা৷ সেয়েহে, কোনো ব্যক্তিৰ কেৰিয়াৰ গঢ় দিয়া ক্ষেত্ৰত কিতাপ পঢ়াৰ
ভূমিকা অমূল্য আৰু অনস্বীকাৰ্য৷ আধুনিক বিজ্ঞান আৰু প্ৰযুক্তিৰ বতৰাই তথ্যৰ সহজলভ্যতা
নিশ্চিত কৰিলেও, কিতাপৰ মৰ্যাদা আজিও অক্ষুণ্ণ হৈ আছে৷ ডিজিটেল মাধ্যমসমূহে তথ্য দিয়ে,
কিন্তু কিতাপে দিয়া গভীৰ আৰু স্থায়ী জ্ঞানৰ কোনো বিকল্প নাই৷ সেয়েহে, কিতাপ পঢ়াৰ
অভ্যাস কেৱল একাডেমিক সফলতাৰ বাবেই নহয়, জীৱনৰ সকলো ক্ষেত্ৰত অগ্ৰগতিৰ বাবে অপৰিহাৰ্য এক চাবিকাঠি৷ এই প্ৰবন্ধত কিতাপ পঢ়াৰ ফলত সফল কেৰিয়াৰ গঢ় দিয়াত কেনেদৰে অৰিহণা
যোগায় সেই বিষয়ে আলোকপাত কৰা হৈছে৷
জ্ঞান আহৰণ আৰু দক্ষতা বিকাশ :
যিকোনো কেৰিয়াৰ বাছনি কৰাৰ পাছত প্ৰথম আৰু মূল প্ৰয়োজন হৈছে পৰ্যাপ্ত জ্ঞান আৰু প্ৰয়োজনীয় দক্ষতা৷ চিকিৎসক হ’বলৈ চিকিৎসাশাস্ত্ৰৰ কিতাপ, ইঞ্জিনিয়াৰ হ’বলৈ ইঞ্জিনিয়াৰিঙৰ কিতাপ, আইনজীৱী হ’বলৈ আইন সংক্রান্তীয় কিতাপ — সকলো ক্ষেত্ৰতে কিতাপৰ গুৰুত্ব অস্বীকাৰ কৰিব নোৱাৰি৷ পঢ়াৰ সময়ত পাঠ্যপুথিৰ লগতে ৰেফাৰেঞ্চ কিতাপ, গাইড বুক আৰু প্ৰশ্নসম্ভাৰ অধ্যয়ন কৰিলে জ্ঞানৰ ভেঁটি বহুগুণে দৃঢ় হয়৷ উদাহৰণস্বৰূপে, অসামৰিক সেৱাৰ পৰীক্ষা বা ৰাষ্ট্রীয় যোগ্যতা বাচনিৰ দৰে পৰীক্ষাৰ প্ৰস্তুতিত কেৱল নোট আৰু ক্লাছ– নোটৰ ওপৰত নিৰ্ভৰ নকৰি বিস্তৃতভাৱে কিতাপ পঢ়িলে প্ৰাৰ্থীসকল সফল হোৱাৰ বাবে অধিক সক্ষম হয়৷ কিতাপ পঢ়া মানে কেৱল তথ্য মুখস্থ কৰা নহয়; ই হৈছে তথ্যক গভীৰভাৱে বুজা, বিশ্লেষণ কৰা, প্ৰশ্ন উত্থাপন কৰা আৰু সেই প্ৰশ্নসমূহৰ সমাধান বিচৰা প্ৰক্ৰিয়া৷ এই অভ্যাস ব্যক্তিক বিশেষজ্ঞ হিচাপে গঢ়ি তোলে৷ সেইদৰে, কেৰিয়াৰত অগ্ৰগতিৰ ক্ষেত্ৰত কিতাপৰ ভূমিকা অতুলনীয় আৰু বিশেষ গুৰুত্বপূৰ্ণ৷
চিন্তাশক্তি আৰু বিশ্লেষণ ক্ষমতা বৃদ্ধি :
যিকোনো সফল পেছাজীৱিয়ে কেৱল তথ্য সংগ্ৰহ নকৰে; তেওঁ সিদ্ধান্ত
ল’ব পাৰে, সমস্যাৰ মূল বিষয় চিনাক্ত কৰিব পাৰে
আৰু নতুন দিশ উন্মোচন কৰিবলৈ সক্ষম হয়৷ এই সকলো ক্ষমতা নিয়মিত কিতাপ পঢ়াৰ অভ্যাসৰ
ফলস্বৰূপ বিকশিত হয়৷ ইতিহাসৰ কিতাপ পঢ়িলে সমাজ আৰু অৰ্থনীতিত হোৱা পৰিৱৰ্তন বুজিবলৈ
সহায় হয়, বিজ্ঞানৰ কিতাপে প্ৰযুক্তি আৰু যুক্তিশীল চিন্তাধাৰা বিকাশ কৰে আৰু সাহিত্যৰ
কিতাপে মানৱ মনোবিজ্ঞান আৰু জীৱনৰ জটিলতা উপলব্ধি কৰাত সহায় কৰে৷ এই অভ্যাসই ব্যক্তিক
যিকোনো তথ্য সমালোচনামূলক দৃষ্টিৰে পৰ্যালোচনা কৰিবলৈ সক্ষম কৰি তোলে৷ বিশ্লেষণ ক্ষমতা
কেৰিয়াৰত অতি গুৰুত্বপূৰ্ণ৷ উদাহৰণস্বৰূপে, ব্যৱসায়ীয়ে নতুন উদ্যোগ আৰম্ভ কৰিব বিচাৰে,
তেন্তে তেওঁক বজাৰ, গ্ৰাহক, প্ৰযুক্তি আৰু নীতি-নিয়মসমূহ বিশ্লেষণ কৰিবলৈ সক্ষম হ’ব লাগিব৷ নিয়মিত কিতাপ পঢ়াৰ অভ্যাসে এনে গুৰুত্বপূৰ্ণ বিশ্লেষণাত্মক
দক্ষতা বিকাশত গুৰুত্বপূৰ্ণ ভূমিকা পালন কৰে৷
ভাষা, যোগাযোগ আৰু প্ৰেজেণ্টেশ্বন দক্ষতা :
যিকোনো কেৰিয়াৰত ভাষা আৰু যোগাযোগৰ দক্ষতা অত্যন্ত গুৰুত্বপূৰ্ণ৷
যিজন ব্যক্তিয়ে নিজৰ ধাৰণা স্পষ্ট আৰু ফলপ্ৰসূভাৱে প্ৰকাশ কৰিব পাৰে তেওঁ সফলতাৰ পথত
অধিক আত্মবিশ্বাসেৰে আগবাঢ়ি যায়৷ কিতাপ পঢ়াৰ মাধ্যমে শব্দভাণ্ডাৰ সম্প্ৰসাৰণত সহায়
কৰে, ভাষা পৰিশোধন কৰে, আৰু লিখা আৰু কোৱা দুয়োটা দক্ষতা উন্নত কৰে৷ আজিৰ কৰ্পৰেট
জগতখনত ছফ্ট স্কিল, যোগাযোগ দক্ষতা আৰু উপস্থাপন ক্ষমতাৰ চাহিদা অপৰিসীম৷ এই ক্ষেত্ৰত
কিতাপ পঢ়া বিশেষ সহায়ক৷ উদাহৰণস্বৰূপে, ইংৰাজী বা আঞ্চলিক সাহিত্য পঢ়িলে ভাষা আৰু
শৈলী বৃদ্ধি কৰে, আনহাতে ব্যৱসায়িক ব্যৱস্থাপনা বা প্ৰেৰণাদায়ক বিষয়ৰ কিতাপ পঢ়ি
কৰ্পৰেট উপস্থাপন আৰু যোগাযোগ দক্ষতা শক্তিশালী হয়৷
সৃষ্টিশীলতা আৰু উদ্ভাৱনশক্তি :
যিকোনো ক্ষেত্ৰত শ্ৰেষ্ঠতা অৰ্জন কৰিবলৈ সৃষ্টিশীলতা অত্যন্ত
প্ৰয়োজনীয়৷ সাহিত্য, বিজ্ঞান কল্পকাহিনী আৰু শিল্প সম্পৰ্কীয় কিতাপ পঢ়ি মানৱ-মস্তিষ্কক
নতুন দিশে চিন্তা কৰিবলৈ প্ৰেৰণা দিয়া হয়৷বহু উদ্ভাৱক, বিজ্ঞানী, উদ্যোগী আৰু শিল্পীয়ে
কিতাপ পঢ়াৰ দ্বাৰাই অনুপ্ৰেৰণা লাভ কৰিছে৷ উদাহৰণস্বৰূপ, এ. পি. জে. আব্দুল কালামে
জীৱনত বিশেষ অনুপ্ৰেৰণা লাভ কৰিছিল কিতাপৰ পৰা, আৰু এলন মাস্কে সৰুতে বিজ্ঞান কল্পকাহিনী
আৰু পদাৰ্থবিজ্ঞানৰ কিতাপ পঢ়ি স্পেছএক্স
(SpaceX) আৰু টেছলা (Tesla) উদ্ভাৱন কৰাৰ স্বপ্ন গঢ়িছিল৷ সৃষ্টিশীলতা কেৱল শিল্পৰ
ক্ষেত্ৰতে সীমাৱদ্ধ নহয়; ব্যৱসায়, প্ৰযুক্তি আৰু ব্যৱস্থাপনা আদি সকলো ক্ষেত্ৰত ই
অত্যন্ত প্ৰয়োজনীয়৷ সৃষ্টিশীলতাৰ বিকাশত কিতাপ পঢ়া এক মুখ্য উপাদান হিচাপে কাম কৰে৷
কেৰিয়াৰ বাছনি আৰু দিশ নিৰ্দেশনা :
কেৰিয়াৰ পথৰ সন্দৰ্ভত অস্পষ্টতাই বহু শিক্ষাৰ্থীক বিভ্ৰান্তিত পেলায়৷ এনে সময়ত কেৰিয়াৰ নিৰ্দেশনামূলক গ্ৰন্থ, অনুপ্ৰেৰণামূলক আত্মজীৱনী আৰু সফল ব্যক্তিসকলৰ
অভিজ্ঞতাৰ ৰচনাৰ অধ্যয়নে এটা সুস্পষ্ট দৃষ্টিভংগী প্ৰদান কৰে৷ উদাহৰণস্বৰূপে, সাংবাদিকতাৰ ক্ষেত্ৰত
আগ্ৰহী এজন যুৱকে প্ৰতিষ্ঠিত সাংবাদিকৰ জীৱন কাহিনী পঢ়িলে সেই পেছাত থকা সুযোগ, প্ৰত্যাহ্বান আৰু বাস্তৱতা বুজি পায়৷ একেদৰে, চিকিৎসা, প্ৰযুক্তি, আইন, সমাজকৰ্ম আদি যিকোনো ক্ষেত্ৰৰ
জ্ঞানপূৰ্ণ গ্ৰন্থই শিক্ষাৰ্থীসকলক সঠিক আৰু সুস্পষ্ট কেৰিয়াৰ পথ নিৰ্বাচনত সহায়
কৰে৷
মানসিক দৃঢ়তা আৰু সহনশীলতা :
কেৰিয়াৰ গঢ়াৰ যাত্ৰা সহজ নহয়৷ সফলতাৰ বাটত বিফলতা, প্ৰতিযোগিতা, সময়ৰ অভাৱ, বিভিন্ন প্ৰত্যাহ্বানৰ সন্মুখীন হ’বলগীয়া হয়৷ এনে পৰিস্থিতিত আত্মসহায়ক গ্ৰন্থ, প্ৰেৰণাদায়ক সাহিত্য, মহান ব্যক্তিত্বৰ জীৱনী আদিয়ে মানসিক শক্তি আৰু স্থিতিস্থাপকতা প্ৰদান কৰে৷ যেনে স্বামী বিবেকানন্দৰ লেখা বা মহাত্মা গান্ধীৰ আত্মজীৱনী পঢ়ি এজন ছাত্ৰই সাহস আৰু ধৈৰ্যৰ গুৰুত্ব শিকে৷ একেদৰে কল্পনা চাওলা বা নীল আৰ্মষ্ট্ৰংৰ জীৱনী পঢ়িলে মহাকাশ বিজ্ঞানৰ ক্ষেত্ৰখনতো অনুপ্ৰাণিত হয়৷
দৃষ্টিভংগীৰ বিস্তাৰ আৰু বিশ্বজনীনতা :
একবিংশ
শতিকাৰ বিশ্বায়নৰ যুগত এটা কেৰিয়াৰ কেৱল স্থানীয় নহয়— ই বিশ্বব্যাপী৷
বৈচিত্ৰ্যময় সংস্কৃতি, সমাজ, অৰ্থনীতিৰ জ্ঞান আজি অপৰিহাৰ্য হৈ পৰিছে৷ ইতিহাস, ভূগোল,
সংস্কৃতি, আন্তঃৰাষ্ট্ৰীয় ৰাজনীতিৰ ওপৰত লিখা গ্ৰন্থই ছাত্ৰ-ছাত্ৰীৰ দৃষ্টিভংগী বহল
কৰাত গুৰুত্বপূৰ্ণ ভূমিকা পালন কৰে৷ ইমান বহল আন্তঃৰাষ্ট্ৰীয় দৃষ্টিভংগীৰ অবিহনে বহুজাতিক
কোম্পানীত কাম কৰা, আন্তঃৰাষ্ট্ৰীয় সহযোগিতামূলক প্ৰকল্পত অংশগ্ৰহণ কৰা বা গৱেষণামূলক
কাৰ্যকলাপত জড়িত হোৱাটো প্ৰায় অসম্ভৱ৷ গতিকে পঢ়াৰ জৰিয়তেহে ছাত্ৰ-ছাত্ৰীক বিশ্ব
নাগৰিক হিচাপে গঢ় দিব পাৰি৷
পঢ়া আৰু নেটৱৰ্কিং/প্ৰফেশ্বনেল স্বীকৃতি :
এজন পৰ্যাপ্ত পঢ়া ব্যক্তিয়ে যিকোনো কথা-বতৰাত আত্মবিশ্বাসেৰে
অংশগ্ৰহণ কৰিব পাৰে৷ কিতাপৰ পৰা লাভ কৰা জ্ঞান সন্মিলন, আলোচনা চক্ৰ, সাক্ষাৎকাৰ বা
বিতৰ্কত সহায়ক বুলি প্ৰমাণিত হয়৷ যিকোনো বৃত্তিতে নেটৱৰ্কিং অতি প্ৰয়োজনীয়, আৰু
নিয়মিতভাৱে পঢ়া ব্যক্তিয়ে আনৰ পৰা বৌদ্ধিক সন্মান আৰু আস্থা লাভ কৰে৷ এই পেছাদাৰী
স্বীকৃতিয়ে সফল কেৰিয়াৰ গঢ়ি তোলাৰ এক গুৰুত্বপূৰ্ণ পদক্ষেপ হিচাপে কাম কৰে৷
অনুপ্ৰেৰণা আৰু জীৱনমুখী শিক্ষা :
মানুহে জীৱনৰ যিকোনো পৰ্যায়ত অনুপ্ৰেৰণাৰ প্ৰয়োজন অনুভৱ কৰে৷
অনুপ্ৰেৰণা নোহোৱাকৈ অধ্যৱসায় বজাই ৰখা কঠিন হয়৷ কিতাপ, বিশেষকৈ আত্মজীৱনী আৰু প্ৰেৰণাদায়ক
সাহিত্য, এই অনুপ্ৰেৰণা প্ৰদান কৰে৷ ডেল কাৰ্নেগী, ৰবীন্দ্ৰনাথ ঠাকুৰ, ড°এ পি জে আব্দুল কালামৰ দৰে মহান ব্যক্তিৰ কিতাপ পঢ়ি ছাত্ৰ-ছাত্ৰীসকলে
জীৱনত ধৈৰ্য, সততা আৰু অধ্যৱসায়ৰ গুৰুত্ব শিকে৷
আজীৱন অধ্যয়ন :
কেৰিয়াৰ হৈছে এক দীঘলীয়া যাত্ৰা, য'ত সদায় নতুন প্ৰযুক্তি,
নিয়ম-নীতি আৰু প্ৰত্যাহ্বানসমূহ উদয় হয়৷ এনে পৰিৱৰ্তনসমূহৰ সৈতে খাপ খোৱাত কিতাপ পঢ়াৰ
অভ্যাস বিশেষ গুৰুত্বপূর্ণ৷ যি ব্যক্তিয়ে নিয়মীয়াকৈ পঢ়ে, তেওঁ নতুন পৰিস্থিতি আৰু পৰিৱৰ্তনৰ
সৈতে সহজে খাপ খুৱাব পাৰে৷ উদাহৰণস্বৰূপে, আইনজীৱিয়ে নতুন আইন শিকিবলৈ, ইঞ্জিনিয়াৰে
নতুন প্ৰযুক্তি বুজিবলৈ, আৰু চিকিৎসকে নতুন চিকিৎসা প্ৰণালী অধ্যয়ন কৰিবলৈ কিতাপৰ
ওপৰত নিৰ্ভৰ কৰে৷ সেয়েহে কিতাপ হৈছে আজীৱন অধ্যয়নৰ অবিচ্ছেদ্য সংগী৷
কিতাপ পঢ়াৰ অভ্যাসে কেৰিয়াৰ গঢ়াত বহুমুখী ভূমিকা পালন কৰে৷
ই জ্ঞানৰ ভঁৰাল সমৃদ্ধ কৰে, চিন্তাশক্তি বিকাশ কৰে, ভাষাক সৰল-স্পষ্ট কৰে আৰু সৃষ্টিশীলতাক
উৎসাহিত কৰে৷ ইয়াৰোপৰি, কিতাপই কেৰিয়াৰৰ দিশদৰ্শন কৰে, মানসিক দৃঢ়তা দিয়ে, এক বিশ্বজনীন
দৃষ্টিভংগী গঢ়ি তোলে আৰু জীৱন জুৰি শিক্ষা গ্ৰহণৰ প্ৰেৰণা যোগায়৷ বৰ্তমান তথ্যৰ যুগত
নানা মাধ্যম উপলব্ধ হলেও কিতাপৰ প্রয়োজনীয়তা
অক্ষুণ্ণ হৈয়েই আছে৷ কিতাপেহে মানুহৰ আত্মশক্তিক জগাব পাৰে আৰু কেৰিয়াৰ গঢ়াত এক
স্থায়ী ভেটিৰ দৰে সহায় কৰে৷ সেয়েহে, প্ৰতিগৰাকী ছাত্ৰ-ছাত্ৰী আৰু যুৱক-যুৱতীৰ কিতাপ
পঢ়াৰ অভ্যাস গঢ়ি তোলা অতি প্রয়োজনীয়৷ কিতাপক বন্ধু, পথ প্ৰদৰ্শক আৰু গুৰুৰ দৰে গ্ৰহণ
কৰিলে কেৰিয়াৰৰ পথ সুগম আৰু উজ্জ্বল হৈ উঠিব৷
***
ড০ বুলজিৎ বুঢ়াগোহাঁই
কেৰিয়াৰ পৰামৰ্শদাতা তথা মুৰব্বী,
যান্ত্রিক অভিযান্ত্রিক
বিভাগ, অসম ডন বস্ক’বিশ্ববিদ্যালয়
ভ্ৰাম্যভাষ : ৯৪৩৫১৮৮৬৩০
ই-মেইল: buljit@gmail.com , www.buljit.com
বি.দ্র. : কেৰিয়াৰ
বিষয়ৰ বিভিন্ন কথা কোনো আগ্ৰহী শিক্ষাৰ্থীয়ে জানিব বিচাৰে, তেন্তে প্ৰত্যেক শনিবাৰে
বিয়লি ৬-৯ বজাৰ ভিতৰত ফোন(৯৪৩৫১৮৮৬৩০)ত যোগাযোগ কৰিব পাৰে ৷
