অৰণ্যত দুৰ্গাপূজা

সংকল্পজিৎ শইকীয়া

অৰণ্যৰ ৰজা	সিংহৰ কথাত
হাবিত পাতিছে পূজা,
হাতী, বাঘ আদি	সকলো জন্তুৰ
মনত লাগিল মজা।


বাঘৰ পুতেক	বাঘেশ্বৰ বৰাই
কিনিলে বল-বেট,
সমনীয়াৰ লগত	বাঘৰ পুতেকে
খেলিব হেনো ক্ৰিকেট।


হাতীৰাম গগৈৰ	দুয়োটা পুতেক
অতিকে শান্ত-শিষ্ট,

বেলুন, পুতলা	একো কিনা নাই
কেৱল খোৱাত ব্যস্ত।


কিয়া ছেল্টছ্	গাড়ীত উঠি
ভালুকে চালে পূজা,
নতুন গাড়ীত	উঠি ভালুকীৰ
মনত লাগিল মজা।


ফপৰা শিয়াল	আৰু শিয়ালীয়ে
মিঠাইৰ বেপাৰ কৰে,
খঁকুৱা পুতেকে	তাৰে আধাখিনি
অকলেই শেষ কৰে।


মলুৱা বান্দৰে	বান্দৰীৰ লগত
পূজাত কৰিলে ইনজয়,
পুতেক দুটাৰ	কাৰণে সিহঁতে
পুতলা কিনি লয়।


হৰিণী ওলাল	সাজি-কাচি
পূজা চাবলৈ বুলি,
ওঁঠত লিপ্‌ষ্টিক	চকুত কাজল
ষ্টাইল কৰিলে চুলি।


অৰণ্যত পূজা	পাতে উলাহেৰে
সকলোটি মিলি-জুলি,
আটায়ে প্ৰাৰ্থনা	কৰিছে দেৱীক
সকলোৰে ভাল হওক বুলি।