বতাহ, পানী, শিল

মূল : অক্টাভিঅ’ পাজ

ভাবানুবাদ : যশোৱন্ত নিপুণ

 

পানীয়ে সুৰংগ খান্দে শিলত,

বতাহে পানীবোৰ সিঁচি দিয়ে দূৰলৈ,

শিলে বতাহক আগচি ধৰে ৷

পানী, বতাহ, শিল ৷

 

বতাহে শিলক আকৃতি দিয়ে,

শিল এটা পানীৰ পিয়লা,

পানী হেৰাই যায় আৰু বতাহ হয়,

শিল, বতাহ, পানী ৷

 

বতাহে তাৰ চাকনৈয়াত গায়,

প্ৰৱাহিত পানীয়ে সুহুুৰিয়ায়,

নিশ্চল শিল নীৰৱ চিৰকাল ৷

বতাহ, পানী, শিল ৷

 

প্ৰত্যেকেই ভিন্ন আৰু এক :

পাৰ হয় আৰু হেৰাই যায়

সিহঁতৰ শূন্য নামবোৰৰ মাজেৰে :

পানী, শিল, বতাহ ৷