চুনা কুমাৰ পাঠৰী
কেতিয়াবা সহজ বুলি ভবা সৰলৰেখা এডালো খেলিমেলি
সপোনৰ বাট ইমান সৰলৰৈখিক নহয়
কোনো ভালপোৱাতে পূৰ্ণতা নাই
জীৱনৰ জটিল ভগ্নাংশৰ সঠিক সমাধানো নাই
ভালপোৱানো কি ! সম্পৰ্কবোৰ ক্ষুদ্ৰতৰ ভগ্নাংশৰ
একোটা নিঃকিন অংশহে মাথোঁ,
সকলো শূন্য আৰু দশমিকৰ দোমোজাত
গণিতৰ এটা সমস্যাৰ সমাধান কৰিবলৈ যিমান চৰ্তৰ প্ৰয়োজন
জীৱন আৰু প্ৰেমত তাতোকৈ বেছি
বিয়োগ, হৰণ-পূৰণ
কিনো ক’ম -
সেয়ে কত কবি এনেকৈ ডাংবৰলা
আজিকালি কবিতা পঢ়ি কোনোবা ছোৱালী
আহিব হ’বলা !
আচৰিত ! কোনোদিনে অঙ্কছাৰৰ
ৰঙা চকুৰ প্ৰিয় ৰং হ’ব নোৱাৰিলোঁ
তথাপি কঠিন সময়ৰ সাগৰত বুৰ গৈ
নিজে অংকৰ অনুশীলন চলাই আছোঁ
ভুল-শুদ্ধ, কটাকটি বিচ্ছেদৰ
য’ত সুখ-দুখ সমীকৰণৰ বৰ্গক্ষেত্ৰ
বাৰে বাৰে সমাধান কৰি একেটাই উত্তৰ পাওঁ -
জীৱনটোৱেই দ্বিঘাত সমীকৰণ
ভালপোৱাক কৰিব নাৱাৰি সৰলীকৰণ...।
ভ্ৰাম্যভাষ: ৭০০২৫৯৪৭৬৮
